काठमाडौँ । कुवेतले आगामी जुन १ तारिखदेखि कुवेत अन्तर्राष्ट्रिय विमानस्थलमार्फत अन्तर्राष्ट्रिय हवाई उडान पुनः सञ्चालन गर्ने घोषणा गरेको छ। अरब मुलुकका साथै अन्य अन्तर्राष्ट्रिय एयरलाइन्सका उडानहरू चरणबद्ध रूपमा सञ्चालनमा ल्याइने जनाइएको छ।
कुवेत नागरिक उड्डयन महानिदेशालयका महानिर्देशक शेख हुमौद मुबारक अल सबाहले विमानस्थलको पूर्वाधार सुधार, प्रणाली स्तरोन्नति तथा सञ्चालनसम्बन्धी मर्मत-सम्भार कार्य सम्पन्न भएपछि उडान पुनः सुरु गर्ने निर्णय गरिएको जानकारी दिएका छन्।
उनका अनुसार सुरक्षित र व्यवस्थित हवाई सेवा सुनिश्चित गर्न आवश्यक प्राविधिक तयारी तथा सञ्चालन मूल्यांकन जारी रहेको छ। विमानस्थल र उडान सेवाको पुनः सञ्चालन प्रत्येक चरणको प्राविधिक परीक्षण तथा अवस्थाको मूल्यांकनका आधारमा विस्तार गरिने जनाइएको छ।
महानिर्देशक अल सबाहले विशेष गरी टर्मिनल-१ मा यात्रु सेवा तथा सुरक्षा मापदण्डलाई थप प्रभावकारी बनाउन स्तरोन्नति र विकासका काम भइरहेको बताएका छन्। यात्रु चाप व्यवस्थापन र सहज आवागमन सुनिश्चित गर्ने उद्देश्यले विमानस्थलका संरचना तथा सेवा प्रणालीमा सुधार गरिएको पनि उनले उल्लेख गरेका छन्।
