काठमाडौँ । धादिङको रुबीभ्याली क्षेत्रमा साइक्लिङका क्रममा भीरबाट खसेर अड्किएका एक पुरुषको नेपाली सेनाको टोलीले उद्धार गरेको छ।
काठमाडौँ महानगरपालिका-कपन निवासी ती पुरुष जेठ १० गते धादिङस्थित रुबीभ्याली गाउँपालिका-३ को सवालुंङ भीर क्षेत्रमा साइक्लिङ गरिरहेका बेला करिब २०० मिटर तल खसेर अड्किएको अवस्थामा फेला परेका थिए।
उद्धारका लागि नेपाली सेना अन्तर्गतको भैरव गण (बोरांङ) बाट खटिएको टोलीले नेपाल प्रहरी र स्थानीयवासीसँग समन्वय गरी उद्धार कार्य सञ्चालन गरेको जनाएको छ।
घाइतेलाई घटनास्थलमै प्राथमिक उपचार प्रदान गरिएको थियो। त्यसपछि करिब सात किलोमिटर दूरीसम्म स्ट्रेचरमार्फत बोकेर सुरक्षित स्थानमा पुर्याइएको र थप उपचारका लागि हेलिकोप्टरमार्फत काठमाडौँ पठाइएको जनाइएको छ।
