काठमाडौँ । अमेरिकी राष्ट्रपति डोनाल्ड ट्रम्पले इरानविरुद्ध सैन्य कारबाही अघि बढाउने आफ्नो निर्णयप्रति कुनै पछुतो नरहेको बताएका छन्। एक अन्तरवार्तामा आगामी नोभेम्बरमा हुने मध्यावधि निर्वाचनमा युद्धको निर्णयले पार्न सक्ने प्रभावबारे सोधिएपछि ट्रम्पले आफूले लिएको निर्णयप्रति पुनर्विचार गर्नुपर्ने अवस्था नरहेको धारणा व्यक्त गरेका हुन्। बिहीबार प्रसारित ‘द इन्ग्राहम एंगल’ कार्यक्रममा उनले आफूलाई निर्णयप्रति पछुतो नरहेको स्पष्ट पार्दै आवश्यक परे पुनः त्यही कदम चाल्ने बताए। ट्रम्पले युद्धका कारण आफ्ना केही समर्थक असन्तुष्ट र निराश रहेको भन्ने दाबीसमेत अस्वीकार गरेका छन्। निर्वाचनमा सम्भावित राजनीतिक असरभन्दा आफूले लिएको निर्णयलाई उचित ठान्नु महत्वपूर्ण रहेको उनको भनाइ छ। इरानसँगको द्वन्द्वका विषयमा ट्रम्पले यसअघि पनि आफ्नो प्रशासनको सैन्य कदमको बचाउ गर्दै आएका छन्। पछिल्लो अभिव्यक्तिले आगामी निर्वाचनको राजनीतिक प्रभावको चर्चा भइरहेका बेला पनि उनी आफ्नो निर्णयबाट पछि हट्ने पक्षमा नरहेको संकेत गरेको छ।