सिरहा । सिरहामा लागू औषध गाँजा ओसारपसारमा प्रयोग गरिएको एक एम्बुलेन्सलाई प्रहरीले नियन्त्रणमा लिएको छ। एम्बुलेन्सबाट १०५ किलोग्राम गाँजा बरामद भएको छ भने चालक फरार रहेका छन्।

मंगलवार ८ बजे चोहर्वातर्फबाट ज १ च १२१३ नम्बरको एम्बुलेन्समा गाँजा लोड गरी सिरहातर्फ ल्याइँदै गरेको भन्ने गुप्त सूचनाका आधारमा जिल्ला प्रहरी कार्यालय सिरहाको टोली खटिएको थियो।

प्रहरी टोलीले पछाडिबाट पछ्याउँदै जाँदा सिरहा नगरपालिका वडा नं. १ स्थित हुलाकी सडक खण्डमा चालक एम्बुलेन्स छाडेर फरार भएका थिए। प्रहरीले उक्त एम्बुलेन्स नियन्त्रणमा लिई जाँच गर्दा भित्र जुटको ५ वटा बोरामा राखिएको १०५ किलो गाँजा फेला परेको हो।

गाँजासहित एम्बुलेन्स जिल्ला प्रहरी कार्यालय सिरहामा राखिएको छ। फरार रहेका एम्बुलेन्स चालकको पहिचान तथा खोजतलासका साथै घटनाबारे थप अनुसन्धान भइरहेको प्रहरीले जनाएको छ।