काठमाडौँ । वैदेशिक रोजगारीका लागि गन्तव्य मुलुकमा रहेका नेपाली कूटनीतिक नियोगबाट हुने मागपत्र प्रमाणीकरण प्रक्रियालाई सहज र समयमै सम्पन्न गर्न निर्देशन दिएको छ। गन्तव्य मुलुकस्थित नेपाली नियोगमा मागपत्र प्रमाणीकरण गर्न समय लाग्ने तथा प्रमाणीकरणका लागि अपुग कागजातको जानकारी एकै पटक नदिँदा रोजगारदाता कम्पनीले झन्झट व्यहोर्नुपरेको गुनासो आएपछि युवा, श्रम तथा रोजगार मन्त्रालयले यस्तो निर्देशन दिएको हो। मन्त्रालयका अनुसार भदौ २६ गते भएको मन्त्री स्तरीय निर्णयअनुसार परराष्ट्र मन्त्रालयमार्फत सबै नेपाली कूटनीतिक नियोगहरूलाई पत्राचार गर्दै प्रचलित कानुनबमोजिम तोकिएको समय सीमाभित्रै मागपत्र प्रमाणीकरण गर्न निर्देशन दिइएको छ। निर्देशनअनुसार अब गन्तव्य मुलुकका रोजगारदाता कम्पनीले मागपत्र प्रमाणीकरणका लागि नेपाली कूटनीतिक नियोगमा आवेदन दिँदा थप कुनै कागजात आवश्यक परेमा सोको जानकारी एकै पटक (एकमुष्ट) अनिवार्य रूपमा दिनुपर्नेछ। यस निर्णयले रोजगारदाता कम्पनीहरूले भोग्दै आएको सास्ती हट्ने र वैदेशिक रोजगारीको मागपत्र प्रमाणीकरण प्रक्रिया थप पारदर्शी एवम् छिटोछरितो हुने विश्वास लिइएको छ।